فترات

من فتره قابلت انسانه كنا فاكرين نفسنا بنحب بعض ، سفر وخروج وكلام وحكايات وضحك واغاني وتليفونات ، كل واحد فينا كان بيتعامل كإنه ضامن وجود التاني وكإن وجودنا سوا أمر حتمي وانه من رابع المستحيلات نتفرق ، عدت جنبي عادي ، عاااااادي ، كإنها مثلاً مطر مكملش او عربيه فرملت جامد مجرد ماشفتها شيلت عيني ومشيت ، مافتكرتش أي حاجه ولا افتكرت حتي السنه اللي عرفنا بعض فيها ولا الأيام اللي اثرت فيا لما اتفارقنا ، الحقيقه ان مافيش حب لوحده بيكمل ، حب اللي اخطف واجري واضرب وقابل وسيطر ع الوضع ده ، حب قلة القيمة وعدم احترام مشاعر التاني ، لو كانت لما سابتني ماغلطتش فيا كنت اتأثرت ، لو لما كلمتني وقت ماحتاجتني ف موقف زمان رديت عليها كان زمانها اتأثرت ، لو راعت ألمي لما حكيتلها عن سر قديم ماكنتش عديت بالسهوله دي ، ولو مكنتش أناني وياها كان زمانها بكت ، الحقيقه اني شوفتها وعااااااادي لدرجة اني فعلا مش فاكرها ، احترموا بعض ياجماعه وارحموا بعض ، شوية عطف وتقدير ود وتفاهم ولين ومسئولية وعدم انانيه ، كل علاقاتكم هتكمل ، انما لو طالبه معاكم حب وكده ، هاتوا روتانا وهتلاقوا السلم والتعبان علبة فشار كبيره وحاجه سقعه وهتصحوا مبسوطين وناسيين ، احسن ماتورطوا حد ف كدبه فاكرينها حب حقيقي