مراحل التهلكه

فيه مراحل تحول كتير في العلاقات الانسانيه بعضها بيكون بطيء ومش محسوب وبعضها بيكون عنيف وغير متوقع ، الحقيقه ان التدرج في التحولات البسيطه هو اللي بيوصل للتحولات الجذريه اللي على رأسها تحول مهم اسمه ( جبت اخري )
واحد بيحب واحدة وبيحاول يوصل معاها لحل كويس او يقربلها بحسب قدراته وشخصيته بكل مافيها من عيوب ومزايا جرب مرة واتنين وتلاته وتسعة وبعدها جاب اخره
بنت روحها ف واحد ، فضلت سنين متعلقه بيه وبتعمل عشانه كل ما ف وسعها وفجأة كل الناس لقوها بتكرهه وعاوزة تبدأ مع حد غيره لو سألتها هتقولك جبت اخري
موظف ضرب مديره ، عسكري تطاول علي رئيسه ، شغاله كسرت مراية لصاحبة الشقه ، ميكانيكي دغدغ عربية زبون ، وحاجات تانيه شبه كده
اياك تصدق ان حد روحه ف حد هيفضل كده مهما شاف ، الشغف الكبير ضل الاهمال الكبير ، واللي بيحبك وبيكره اي حد بيكرهك ، بحاجات معينه ممكن يكرهك ويحب اي حد مش طايقك ، انك تركن لفكرة انك مسيطر على حد وعمره ماهيتغير عليك ده قمة البؤس والانانية مع بعض ، الناس اللي بتنام شايله بتصحي مش فاضيه ، والموقف ورا الموقف ورا الموقف بيحولوا الانسان لانسان غيره ، فماحدش يلوم ع اللي جاب اخره ولايسأله ايه اللي خلاك كده ، عشان اللي شافه واستحمله وصبر عليه ماينفعش يتحكي ، انا قولت اقولكم